آییق اولمالی ییق!

گونئی آذربایجانین میللی قورتولوش ساواشی اوز موجادیله یولونو ده وام ائتدیرمکده دیر. ایرقچی رئژیمین بوتون باسقیلارینا، قورخو ـ قده غه لرینه ، مراسیملرین قارشی سینی آلمالارینا ، سیاسی فعاللاری توتوب سیخیشدیرمالارینا ، ایشکنجه و باسقیلارینا قارشی میللی موجادیله نی دوردورا بیلمه میشدیر. حتا اوزوموزده ن اولان مرموز شخصیلری خاریجه گونده رمک ، حرکتین ایچینه سوخما جهدلری تاثیرسیز اولموشدور. حرکت گئت ـ گئده رادیکاللاشماقدا ،دوزگون موباریزه یولونا آیاق قویماقدادیر. بونو گوره ن رئژیم هر مستعمره چی کیمی ، ایشغال ائتدیی اولکه نی قوروماق اوچون یئنی حیله و اویونلارا ال آتماغا چالیشیرو چالیشاجاقدیر. ائله میللی هویت له موخالیف اولمادیغینی یالنیزتجزییه طلب لیکله موخالیف اولدوغونو بیلدیرمه سی رئژیمین میللی حرکت قارشی سیندا آیاق دالی قویماسی دئییل عکسینه یئنی میللی هوییت باشلیغی آلتیندا یئنی اویونا ال آتاجاغیندان خبر وئریر. ائله سوزده تورک دیللی وکیللری (؟!) نین(تورک میللت وکیللری یوخ!!!) تورک فیراکسیاسی دوزه لتمه سیده بو مقصدلی اویونا خیدمت ائتمکده دیر. رئژیمین مقصدی میللی حرکتی پارچالاماق ، ایکی تیره لیک سالماق صادیق و حقیقی میللتچی لری تکله مک ( ایزوله ائتمک) دامغالاماق و یوخ ائتمکدیر. بومقصدله رئژیم اوز یئرلی نوکرلرینده ن ـ قولوقچولاریندان «هویت طلب ؟!» آدیندا قوروملار دوزه لدیب ، میللی حرکتین ایچینه سوخماق ایسته ییر. میللی حرکتی آذربایجانیمیزین مستقیللیک و باغلی سیزلیق یولوندان ، یعنی آذربایجانچیلق ایدولوژوسوندان اوزاقلاشدیریب ، ایرانچیلق هویتی اونا وئرمک دیر حتا رئژیمین باسقی اورقانلاریندان اولان پاسدالار کیمی جانی لری میللی هویت چیلی لییه باغلاییب ، اوتانمازجاسینا اونلاری شهید کیمی گوسترمه یه قالخیر . بو ائله سوزونو ائتدییمیز میللی حرکت ایچینده ایکی تیره لیک سالما جهدلرینده ن بیریدیر. حرکتی ایرانچیلیغا چکمک رئژیمین آنا هدفی دیر. آمما میللی حرکتین ایدولوژیسی ایرانچیلیق یوخ ، آذربایجانچیلق دیر. رئژیم بوندان قورخور چونکی آذربایجانچی لیغین ایران دئییله ن یئرله هئچ بیر علاقه سی یوخدور. هدف گونئی آذربایجانین ایستیقلالییتی دیر. تورکلوک هوویتینه گلدیکده آذربایجان تورکو اولماقدیر، ایران تورکی خئییر!

ائله بونا گوره ده رئژیمین تئوری سینلری یالنیز میللی هوویتله موخالیف اولمادیقلارینی اعلان ائدیرلر. اونلار بو کانالدن میللی حرکتین ایچینه گیریب ، اونو ضعیف لشدیریب ، ایکی تیره لیک سالیب ، حقیقی یولوندان اوزاقلاشدیریب ، میللی حرکت ایچینده شاش ـباشلیق یاراتماقدیر. بونا گوره ده میللی حرکت ایچینده اولانلار، میللی قوروملار و تشکیلاتلار آییق اولمالی ، دویغوسالیق لا ( احساساتلا) مسئله لره یاناشمامالی ، رئژیمین دئدیکلرینی ، حرکتلرینی دوزگون گوتور ـ قوی ائدیب ، رئژیمه خیدمت ائده ن اوزوموزده ن اولان بالتالارین حرکتلرینه دیقت ائتمه لیدیرلر. موباریزه نی گوجلندیریب ، بوتون موباریزه یوللاریندان یارارلانمالیدیرلار. مستعمره چیلرله ـ مستملکه چیلرله ، ایرقچی فوندامنتالیست لرله باریش ایمکانسیزدیر. چونکو اونلارین مقصدی هر مستملکه چی کیمی ، اوز مستعمره سی حالینه سالدیغی آذربایجانی مستعمره سینده ساخلاماق میللی وارلیغیمیزی ، میللی حرکتیمیزی یوخ ائتمک ، تاثیرسیز حاله گتیرمکدیر. ایرانچی لیق ، فارسچیلیق ایچینده یوخ ائتمکدیر. بونو دیندار آذربایجانلیلاریمیزادا خاطیرلاتماق ایسته ردیک کی ، بو موجود رئژیمین ایسلامییتله هئچ بیر علاقه سی یوخدور بو رئژیمین باشچیلاری ایسلامیتدن دانیش سالاردا اونا اینانمیرلار ، اونلار خالقی آلداتماق اوچون ایسلامیتی اوزلرینه آلت ائتمیشلر . ایدعا ائتدیکلری قرآنین ایه لرینه گوره تانری نین و بشرییت ین دوشمنی ساییلیرلار ، چونکو مونافیق دیرلر.