تاسوفله ایران دئییله ن یئرین تاریخینده دئموکراتیک بیر دوزه نین موجود اولمادیغی اوچون دئموکراتیک قایدا ـ قانونلارین و دئموکراتیک اوصوللارین نئجه و نه جور ایجرا اولماسی حاقدا زورلوق چکیله جه یی طبیعیدیر. چونکی دئموکراتیک اولکه لرده چئشیدلی فیرقه لرین ( حزب ـ پارتی) اولماسی و چالیشماسی ، ائله جه ده بیر ـ بیرلریله دئموکراتیک قایدالار اوزه رینده چالیشمالاری دوغال بیر اوصولدور. چئشدلی آدلاردا اولمالاری بیر ـ بیرلریله دوشمنچیلیک معناسینا گلمیر. چونکو هر بیر فیرقه اولکه و میللتی اوچون چالشیر. اولکه نین چیخارلاری فیرقه چیخارلاریندان اوستون ساییلدیغیندان بو فیرقه لر بیر ـ بیرلریله دانیشیرلار و لازیم اولدوقدا ایش بیرلی یی ائدیب ( کوآلیسیونلا) اولکه نی اورتاق ایداره ائدیرلر.
ایران دئییله ن میللتلر دوسداغیندا ایسه تاریخ بویو بئله بیر ایمکان اولمامیشدیر. فقط میللی حوکومت دوورونده دئموکرات فیرقه آدلی بیر بیر فیرقه حکمییتی اله آلسادا او زایش دوزه زینده( پروگرامیندا
صاباح اوچون گوروله جک بیر ایش دوزه نی اولمامیشدیر توپلومدا سیراوی کوتله لری اوز آرخاسینجا چکه بیلمه میش ، فیرقه یه گیره ن یاد قوللوقچولاری دا اوز عمللری ایله ناراضیلیقلارا سبب اولموشدولار. چونکی هر فیرقه ایچینده بیر نیظامنامه لازیم و گره کلی دیر.یعنی بیر فیرقه بیر اورکتستیرا دا اولدوغو کیمی بیر نوت لا چالمالیدیر . هر اورکئستیرا عضوو باشقا بیر نوت چالا بیلمه ز.
شاهلیق اوصول ایداره سی دوورونده و اونون خلف جانیشینی اولان بو رئژیم دورونده اولدوغو کیمی دوغرو ـ دوزگن بیر فیرقه اولمامیشدیر. « ایران » ، « ایران نوین » ، رستاخیز» کیمی فیرقه لر رئژیم طرفینده ن قورولان سوزده فیرقه لر اولموشدور. حتا یاری آزاد « جبهه میللی » ده ده بیر فیرقه ایستوروکتورو و پروگرامی اولمامیشدیر. گیزلی چالیشان توده، موجاهید، و فدایی لرین ایستوروکتورلری گیزلی بیر تشکیلات ، دیکتاتورلوغا دایانان ایدولوژیک بیر چرچیوه سینده ایدی. دیکتاتوریا پرولئتاریا اکثرییتی ایچینه آلان بیر فیرقه اولا بیلمه زدیلر. بونا گوره ده آذربایجانیمیزدا حتا آیدین لاریمیزین بئله نئچه بیر مرامنامه چرچیوه سینده بیر ـ بیرلری ایله چالیشما آلیشقانلیغی اولمادیغینا گوره بوگونده میللی حرکتیمیزده ، میللی قورتولوش موباریزه میزده اونون جزاسینی چکمکده ییک . یعنی بوگون آذربایجانیمیزدا اولان هرکی هرکیلیک، بیر ـ بیرلرینی به ینمه مه کیمی رفتارلارا سون قویمالی ییق. میللی منافع خاطیرینه بیر ـ بیریمیزی تحمول ائتمه لی ییک. بیر مرامنامه و نیظامنامه چرچیوه سینده چالیشمالی ییق. البته چئشیدلی سلیقه لره منسوب شخصیلر آیری ـ آیری فیرقه لر سیراسیندا فعالیت گوسترسه لرده میللی منافع و میللی هدف یادان چیخاریلمامالی ، میللی منافع مطرح اولدوقدا بوتون فیرقه لر بیر یوموروق کیمی حرکت ائتمه لیدیرلر.
طبیعی دیر کی ایسلامی و دیکتاتور بیر توپلومدا( جامعه ده) دئموکراسی اوصوللارین ایجراسی اولدوقجا چئتیندیر. چونکی دئموکراسی نین اساس پایاسی عائله اوجاغیندا قویولوب ، مکتب و توپلومدادا تکامول تاپار. بئله توپلوملاردا عائله ده بیر شخصین ، عومییتله آتانین سوز صاحیبی اولماسی ، چوجوغون بونو گورمه سی ، اوندا چوجوق کن دیکتاتورلوق و فردجیلیک پایالاری قویولموش اولار. چونکی او آتاسینی تقلید ائتمه یه باشلار. مکتبده ده اویره تیجی نین ( معلیمین) سوز صاحیبی اولماسیلا دوام ائده ر. توپلومدادا حوکومت منسوبلاری نین سوزلری و عمللری ، قانون خاریجی بویوروقلاری گوردوکده اوندادا بو احوال ـ روحیه گوجله نیر. بونا گوره ده بئله توپلوملاردا لیدئرلیک ، رهبرلیک آزارلیغی اوزونو عکس ائتدیریر. بزیم توپلومون آزارلیقلاری داها ده ریندیر. آمما بو بیزیم غئیر دئموکراتیک حرکتلریمیزی توجیح ائده بیلمه ز. بیز آذربایجان توپلوموندا ایسته ییمیز دئموکراتیک ، سئکولئر، قانونلارا آرخالانان پارلامنتاریزمه دایانان ، توپلومسال عدالتی اویقولاماق ایسته ین بیر توپلوم یاراتماق ایسته ییریک . بونا گوره ده اوز حرکت و رفتارلاریمیزادا دا بونو عکس ائتدیرمه لی ییک. چونکی بئله توپلوملاردا چئشیدلی فیرقه لر( حزب ـ پارتی لار) مووجوددور. بو پارتیلار بیرـ بیرینه دوشمنچیلیک یوخ ، اولکه و میللت اوچون خئییرلی اولماق اوچوندورلر.
آذربایجان میللی حرکتینده ایشتیراک ائده ن قوروملار( حزب و تشکیلاتلار) اوز ایش دوزه نلرینی ( پروگراملارینی) و مرامنامه لرینی ، حتا نیظامنامه لرینی ارائه ائتمه لیدیرلر. تشکیلاتی فورمادا چالیشماغی و فیکیرلرینی فیرقه نین اساسنامه لری چرچیوه سینده فورموله ائدیب ، خالقین ایختیاریندا قویمالیدیرلار. فردی موجادیله نین مومکون اولمادیغی اوچون آیدین و ضیالیلاریمیز وطنیمیزین گله جه یینی دوشونن لر فیکیرلرینی به یندییمیز فیرقه لره قاتیلیب جمعی شکیلده چالیشماغی اویره نمه لی ییک. بو موباریزه ده باشاریلی اولماق بیرلیکده چالیشماقلا مومکوندور.
هیچ نظری موجود نیست:
ارسال یک نظر