۲۳.۵.۹۵

موباریزه و سیاسی دوسداقلی لیق (زیندانی(





بیر سیاسی موبارز اوچون زندان امتحان ( سناو=امتحان) مرحله سی ساییلا بیله ر. یعنی ان آغیر شرط لر آلتیندا اوز یولونا اولان اینانج و عشقی گوستره بیلمه ایمکانی تاپیر،باش وئرمه یه حاضیر اولوب ، سیر وئرمک ایسته میر..!
آنجاق دورت دووار ایچینده ساواشچی نین دوزوملولوغو ، روحی دورومو و صبری بللی اولموش اولور.
دوشمن دوسداغیندا اسیر دوشموش بیریسی بونو بیلمه لیدیرکی ، او دوسداق اوزوده بیر ساواش مئیدانیدیر. ساواش مئیدانیندا اولدوغو کیمی دوشمنله ساواش حالینده دیر. دوشمنین الینه دوشدویونه گوره، دوشمن بو فورصتده ن یارارلانیب، بوتون ایمکانلاری ایله اونون دیره نیش گوجونو قیرماغا، و اینانجینی سارسیدیب روحو باخیمدان ، اوستونده تاثیر قویوب، اونو ازمه یه چالیشیر. ایشکنجه دن مقصد ده ائله دوسداقداکی نین اراده سینی قیرماقدیر. او آندا دوشمنین قارشی سیندا، ان بویوک سیلاح، ایراده دیر. یعنی دوشمنه قارشی ایراده سیلاحیندان فایدالانماق , دوشمنی سارسیتماق، اوندا اوزونه ـ ایشینه شوبهه یاراتماقدیر. بو شکیلده زیندان ساواشیندا باشاریلی اولان دوسداغا دوشن اولور.
اونوتدماماق لازیمدیرکی ،ماهیر ایشکنجه جی دوسداقلی نین دیری قالماسینی ایسته ر. چونکی ایشکنجه دن مقصد بیلگی الده ائتمکدیر. البته کی ، ایشغالچی رئژیمین ایشکنجه متتودلاری چوخ چئشیدلی دیر( چوخ نوع لیدیر) ، اما هر حال و کاردا اینانج ، عشق و امید اولان زندانی نین دیره نمه سی، موقاویمت گوسترمه سی رئژیمین جلادالارینا میدان اوخوماق معناسینا گه لیر. اونلاری دیزه چوکدوره ن آمیللردیر.
بو یازیدا دیره نمه نین ( موقاویمت ین ) بعضی یوللارین گوتورـ قوی ائتمک ایسته ردیک .
۱ـ هر بیر زندانی نین ایلک دوشوندوغو شئی اونون یاخالانماسینی سبب لریدیر. هانسی سهولره یول وئدییی نی دوشونمکدیر. ایکینجیسی اوز دوستلارینی تشکیلاتینی دوشمنه تانیتماماق ، اونلارین یاخلانمالارینا مانع اولماقدیر.
۲ـایلک ایمکان لاری داخیلینده ، چوخ دیقتلی اولاراق، دوسداغین ائشی یی ایله ارتباط قورماقدیر.
۳ـ دوسداغین ایچینده بئله اوز تشکیلاتی نین امنیتی دوشونمک ، مطلقا شکیلده گیزلی لیک قایدالارینی قوروماق، باشقا محبوسلارا اوز فعالیتلری حقینده بیلگی وئرمه مکدیر. چونکی دوشمن ، یعنی رئژیمه منسوب شخصیلرده زیندانی آدیله اورادا اولا بیلیرلر. سوروشدوورما و ایشکنجه ایله مومکون اولمایان معلوماتی بو شکیلده دوسداقلی دان آلماغا چالیشیرلار.
۴ـ گوروله جک ایشلرده ن بیریده ایشکنجه ائدنلرین حقینده بیلگی لر توپلاماق ، اونلارین کیملیکلرینی تثبیت ائتمک ، محبوسلارین سایسی بیلمک، قوروجولارین ایمکانلارینی و سایی لارینی و.... ییغیب ، بو بیلگیلری دوسداق خاریجینه چاتدیرماقدیر..
۵ـدوسداغین قوروجولاریلا بحث ائدیلمه مه لیدیر. ، و ساده جه زیندانی نین حاقیندا رئژیم، یئترلی میقداردا بیلگی الده ائدیب، بو بیلگیلر اساسیندا رئژیم طرفیندن محکوم ائدیلدیکده ن سونرا ، لازیم گوردوکده ، یئری گلدیکده اونلارا یواش یواش اوز یولو و دوشنجه لری حاقیندا دانیشیب ، اونلارین اوستونده تاٍثیر قویماغا چالیشار. اونودمامالیک کی، اونلار زیندانینی ،رئژیم دوشمنی ، بولوجو ، وطن خائنی و...بیلیرلر،و حقیقتی آنلامالاری اوچون چوخلو زامان و بیلگی لازیمدیر.
۶ـرئژیم سیاسی محبوسلاری آلچاتماق و روحی ضربه لر وورماق اوچون، اونلاری عادی محبوسلارین قووشونا( بند) آتار، آمما اونودماماق لازیمدیرکی ، اوردا اولانلارین چوخو راسیت سیستمیم قورربانلاری دیرلار و بیز اوز فیکریمیزی اونلار ایله پایلاشا بیلیرسک ، هم احترام قازانیب و همده اونلارین ایمکانلاریندان میللی موباریزه اوچون فایذالانا بیله ریک.
۷ـزنداندا بوش واختلاری پیلانلی بیر شکیلده دولدوران ایش دوزه نی ( برنامه) حاضیرلاماق لازیمدیر. ، (ایدمان ـ ورزش) چوخ موهومدور. هم روحیه نی دیری ساخلار ، همده جسمیی سالام توتار، مطلق سیستملی بیر شکیلده آراسی گسیلمه دن اوخوماق لازیمدیر. باشقا دوستلارایله بیرلیکده گروپ حالینده اولورسا داها فایدالیدیر.
۸ـزندانلارین ان بویوک زورلوقلاریندان ـ چتین لیلرینده ن بیری ده تک لیغا غلبه چالماقدیر. خصوصیله بو .بو تک هوجره(انفرادی) ده ساخلانانلار اوچون بویوک اهمییت داشیماقدادیر. ، عمومی قووشلار( بندلرده ) اولانلار اوچونده کئچه رلی ساییلا بیله ر. بونا گوره ده، پیلان توکمک گره کیر.تک لیکده اولان مجادیله نین ایکی یولو وار: :ایچسل و دیش سل، ایچسل: ایچیمیزده اوزوموزو آیری فیکیرلرله مشغول ائدیب ، زیندان اوچون آز دوشونمکدیر ، بونون اوچون ایمکان اولورسا کیتاب اوخوماق ، بو مومکون اولمازسا، اجتماعی ، سیاسی ، فلسفی دوشونجه لری، بو حاقده شخصی فیکیری گوتور ـ قوی ائتمک داها الوئریشلی دیر. یا خود کئچمیشده کی خاطیره لری جانلاندیریب ، ازبریمیز اولدوغو شعرلری ، ترانه لری ترنم ائتمک ، اینسانی راحاتلادا بیله ر. دیش سل : مقصد ، فیکیری و جیسمی باخیمندان ساغلام فعالیتلردیر ، و اونلارین باشیندا ایدمان گئلیر.
۹ـایشکنجه چیلر و زیندان قوروجولاری نین تهدید و شانتاژلاریندان اصلا قورخماماق لازیمدیر. اونلارین زیندانی یه قارشی تهدید و شانتاژلاری اونلارین حقارت دویقولاریندان واوزلرینی آشاغی گورمه کومپلکسلریندن( خود کم بینی) دوغان بیر داورانیشددیر
۱۰ـایشکجه چیلرین بیر آیری ایشلری ایسه زندانیلارین آراسینا سیزدیردیکلاری آداملاری واسیطه سی ایله امیدسیزلیگی یایماق و عین زاماندا یالان خبرلر یایاراق محبوسلارین رئاکسیالارین گوروب و اونلاردان بیلگی الده ائتمکدیر ،هم شاهین ساواکی و هم رئژیمین اطلاعاتی حتی قه زت (روزنامه) لرده بیله یالان خبر یایاراق زیندانیلاری شاش –باش ائتمه یه چالیشیرلار.
۱۱ـباشاردیغینیز قدر دیره نین و بونا اینانین کی سیزلرین هر دقیقه دیره نمه نیز اونلارین پیسیکولوژولارین بوزوپ و اونلاری یورور، بونو بیلمه لییزکی اونلارین ایشکنجه وتهدیدلری بیزیم دیره نیشیمیزی قیرماغ اوچوندور، و اگر بیزیم ایراده نی بو یول ایله قیرامادیق لارینی اوره نیرسه لر ، زور ی بوراخیب ، آیری مئتودلاری ده نه رلر.
۱۲ـزندان بیر میللی فعال و دیره نیشچی اوچون باشدادا قئید ائتدیگیمیز کیمی بیر سناودیر ، وساده جه یولوموزا سونسوز اینانماق و عشق ایله و البته گئله جه یه امید ایله چاغ دیشی ایشکنجه لره و زندانین آغیر و دایانیلماز شرطلرینه دوزمک اولور.

یاشاسین باشی دیک سیاسی محبوسلاریمیز!

۱۲.۵.۹۵

مدنی موباریزه هانسی محیطده مومکوندور؟
میللی حاقلار و مدنی موباریزه
بولوم۲


یوخاریدا دئوموکراتیک اولکه لرله ، ایران دئییله ن یئره حاکیم که سیله ن جینایتکار ، ایرقچی رئژیمله موقاییسه ائتدیکده بویوک وده رین بیر اوچوروم مووجودور. . آن گونجل مسأله لردن بیری غرب اولکه لره گه لن قاچقین و سورگون و سیاسی اینسانلارلا، اونلارین کولتور ومدنییت لرینه یاناشما طرزیدیر. حتا آلمان مکتب لرینده بیر میللته خاص اولان اویرنجی سایی سی ۱۰ نفری کئچیرسه او اوشاقلار اوچون اولکه نین رسمی دیلی یانیندا اوز آنا دیللرینی اوخویوب اویره نمه حاقی قازانیرلار. یالنیز بو نوقطه نی ایران دئییله ن یئرله موقاییسه ائتدیکده قاباریق بیر فرقله قارشیلاشیریق. بو اولکه ده آزلیق دا اولان فارس خالقی نین دیلی بو اولکه ده ایندیلیک یاشاماق زوروندا اولان میللتلره تحمیل ائدیلمکده دیر . اونلارین دیللری و مدنییت لری یاساقلانمیش ، فارس خالقی نین ایچینده اریتمه یه چالیشیلیر،حتا یالانچی یازیلمیش تاریخلری خالقین خوردونا وئرمه یه جهد ائدیرلر. بیر تک سوزله دئسک بو ایرقچی دیکتاتور رئژیم اولکه نین اکثر ساکینینه نه حورمت قویور ، نه ده وطنداش تانیر،حتا خمینی نین یئرینده اوتوران خامنه ای اوزلری نین تعیین ائتدیی سوزده میللت وکیللرینه دئییر کی سیز اوز خالقلارینیزین بو ساحه ده آنا یاسادا اولان ایستکلرینه قولاق وئرمه مه نیز لازیمدیر چونکی او زامان ایران پارچالانار. یعنی مستعمره میزده اولان خالقلارین ایستکلرینه گئدیلیرسه او زامان مستعمره لریمیزی ایتیرمیش اولاریق. ائله بو ذئهنیت اساسیندا بو میللتلر اوزلری وآیدینلاری باسقی و تئرور، ایشکنجه و دوسداق و اعداملارا معروض قالماقدادیرلار.

جهالت آتینا مینه ن بئله جینایتکار ، دیکتاتور و. ایرقچی بیر رئژیم کی مدنییت ین ایینی بئله آلمامیشدیر، نئجه مدنی دیلده دانیشیب ، اوندان تانیمادیغی حاقلاری طلب ائتمک اوالار؟ بو میر غضبده ن باش کسمه مه سینی ایستمک کیمی بیر شئی دیر.اوزونو آلداتماق ، رویالاردا یاشاماق بئله مدنییت سیزلردن غرب مدنییتی توقع سونده بولونماقدیر. بئله بیر شئی بو اولکه نین رئالیقلاریندان اوزاق بیر شئی دیرفارس ایرقیچیلاری هانسی قوماشدان اولوب ، هر هانسی پالتاردادا اولسالار بونو قبول ائده جک کاراکتئرده دئییلدیرلر. نئجه کئچمیش یوگوسلاوییادا سئربلر بونا حاضیر دئییل ایدیلر. ! . . . . .  دوامی وار
مدنی موباریزه هانسی محیطده مومکوندور؟
بولوم ۱


 توپلومسال حیاتدا مدنی اولماق ، مدنی دوشونمک ، مدنی حرکت ائتمک آن ایده‌آل یاشام طرزیدیر ،دئموکراتیک توپلومون خصوصییتلرینده ن  ساییلیر. دئموکراتیک اولکه لرین اوزلرینی مدنی آپارمالاری بو توپلوملارین دئموکراتیک سیاسی دوزه نینده ن ، وحقوق دولتی نین وارلیغی ایله علاقه داردیر. چونکی بو اولکه لرده یاسالارا دایانان بیر نظم ـ اینتیظام  موجودور. یعنی حقوق دولتی حاکیمدیر.بو اولکه لرین حاکمییت لری خالق طرفینده ن سئچیلیر قانون و میللت قارشی سیندا مسئولیت داشیییرلار. اونلارین وظیفه لری  مقام، پول و قوهوم بازلیق یوخ ، اوز میللتلری نین  و اولکه لری نین داهادا  گلیشمه سی ، گله جه یی و خالقین ریفاهی اوچوندور. اولکه ده دولت ایشچیلری میللت ایشچیسی ساییلیرلار.چونکو اونلارین آیلیقلاری( امک ـ حقوقلاری ) میللتین وئردی یی وئرگیلردن تأمین ائدیلیر. یعنی دولتله ،میللت آراسیندا بویوک بیرتضاد موجود دئییلدیر. حتا اولکه داخیلینده فعالیت گوستره ن فیرقه لر، اولکه لری نین منافعی اورتایا گلدیکده بیرلیکده حرکت ائدیب ، بیر آغیزدان دانیشیرلار. طبیعی اولاراق اولکه وطنداشلاری اولکه یاسالارینا حورمتله یاناشاراق اوز اعتیراضلارینی قانونلار چرچیوه سینده مدنی شکیلده حیاتا کئچیریرلر. پولیس ده اونلاری قوروماق مجبورییتینده دیر ،عین زاماندا بو اولکه لرده  یاشایان اهالی  بو اولکه نین  وطنداشلاریدیرلار. بو اولکه  اوز اولکه لریدیر.  مستعمره ده  یاد حاکمیتی آلتیندا یاشامیرلار.
ایران دئییله ن اولکه یه گلدیکده بو اولکه نی هئچ بیر ساحه ده ،بئله دئموکراتیک اولکه لرله موقایسه ائدیلمه سی ایمکانسیزدیر. ایلک اولاراق بو اولکه ده دیکتاتور ، جینایتکار، فوندامنتالیست ـ ایرقچی بیر رئژیم حاکیمدیر.  بو حاکمییت بو اولکه ده یاشاماق مجبورییتینده اولان خالقلارین حقیقی تمثیلچیسی دئییلدیر. عکسینه بو میللتلرین دوشمنی ساییلیر. بو جنابلار اولکه نی شخصی مالیکانه لری ساییب ، بوتون اولکه گلیرلرینی  اوز گلیرلری حئساب ائدیرلر اونلاردان بو حاقدا سورغو حساب سوراجاق بیر اورقان موجود دئییلدیر. مادام العمرده اعدام و ایشکنجه ایله حاکمییتده قالماق ایسته ییرلر .سوزده آپاریلان سئچگی لرینده ، هئچ بیر قانونی کئچرلی یی یوخدور. چونکی سئچگیلر آزاد و دئموکراتیک قایدا ـ قانونلار اساسیندا  آپاریلمیر. آنجاق اونلارین ایسته دیکلری شخصلر سئچگیلره بوراخیلیرلار. . اولکه ده فعالیت گوستره ن هئچ بیر فیرقه یوخدور. بونا ایجازه وئریلمیر. مطبوعات ، رادییو ـ تئلویزییون و مطبوعات ایسه بو جینایتکار ـ ایرقچی رئژیمین کونترولو آلتیندادیر. اونلارین ایجازه سی اولمادان نه یازیلیر ، نه دئییلیر، نه ده گوسته ریلیر. چوخ دانیشان اولدورولور، دوسداق وایشکنجه ائولرینه گونده ریلیر. .اوسته لیک بو اولکه ده اعتیراض ، اوزونده ن مودافعه حاقی یوخدور.چونکو وطنداشلارین حقوقی حاقی یوخدور. دیوان ائولریده  ، محکمه لرده  رئژیمین کونترولو آلتیندادیر. وبوروغو ایله حرکت ائدیرلر.   بو اولکه ده اعدام ائتمک ، آدام اولدورمک سو ایچیم قده ر راحاتدیر. بو ساحه ده دونیادا بیرینجی ساییلیر.  رئژیم اوز موخا لیف لرینی بو وباشقا شکیللرده یوخ ائمکده دیر. پولیس ، پاسدار، بسیجی ، امنیت تشکیلاتلاری  و رئژیمه قوللوقچولوق ائده ن خبرچین لر میللتین جانینی شیشه یه توتماقدادیرلار.  بیر تک سوزله دئسک  ایران دئییله ن یئر بیر بویوک ایشکنجه ائوی و دوسداقدیر . بئله بیر زیندان دا  دئموکراتیک  اولکه لرده  اولدوغو کیمی  نئجه  دییه رلر مدنی  موباریزه  و اعتیراضدان سوز گئده بیلمه ز، بئله بیر ایدعا   آلداتیجی بیر فیکیردیر. ساده لوح لوق دیر. چونکی تئهرانین جینایتکار ، فوندامنتالیست  ایرقچی رئژیمین  حاکیم اولدوغو بیر محیط ده  اونون ایدئولوژیک ، گوروشلری چرچیوه سینده حرکت ائتمک لازیمدیر. بودا دیکتاتور جینایتکار رئژیمین وارلیغینی  قانونی قبول ائتمک ، اونا بویون ایمک دئمکدیر.  بونا گوره ده  موباریزه نین آیری مئتودلاریندان یارارلانماق لازیمدیر.         داوامی وار.