آزادلیغا دایانان دئموکراتیک حقوق دولتی نین اساسینی انسان حاقلاری و آزادلیقلاری تشکیل ائتمکده دیر. دئموکراتیک حقوق دولتینده بو حاقلاری واوز بیله رچی لیکلری – آزادلیقلاری یاسالار تامین ائتسه ده ، اونلارین اجراسینی حاکمیت اورقانلاری قارانتی ائتمه لیدیر.
عدالتلی بیر توپلوم (اجتماعی) یاراتماق اوچون او توپلومدا یاشایان اینسانلار یاسا (قانون) اوستونلویونو ، یاسا عالی لیینی منیمسه مه لی ، یعنی قبول ائتمه لیدیرلر. هر ایش یاسلار (قانونلار) چرچیوه سینده گورولمه لیدیر.
یا سا (قانون) هر مدنی توپلومدا اولدوغو کیمی ، آذربایجان توپلوموندا دا بوتون اینسانلارین کیملی ییندن آسیلی اولمایاراق ، اونلارین حاقلارینی تامین ائتمکله یاناشی ، توپلومدا آرزو ائدیله ن حاق و عدالتی یارادا بیله ر.
عین زاماندا یاسالار چوچیوه سینده فیکیر و بیان آزادلیغی نین موجودلوغو ، دئموکراتیک سیستئم قورونماسی ، اونون تکامل و گلیشمه سی اوچونده لازیمی شرطدیر.
اینسانلارین شخصییتی ، منلی یی ، حتا ملی شعورو (اوز درکی – اوز دویغوسو) آنجاق آزاد بیر محیطده گلیشه ر و تکامل تاپار. عکسینه دیکتاتوربیر محیطده ، دیکتاتورلوق حوکم سوره ن بیر اولکه ده یاشایان اینسانلار قورخاق ، اوز گووه نسیز (اعتماد به نفس) ، شخصیتیلری کیچیک بیر موجودا چئوریلیرلر. بئله محیطدن دوغان عقده لری (کومپلئکس لری) اینسانلار حیات بویو اوزلری ایله داشییر لار.
بیزه گوره مدنیت ، کولتور و اینجه صنعت ده آنجاق آچیق و آزاد بیر محیطده نشو – نما ائده بیله ر.
پیشه وری دئییرکی «کیم آزادلیق و ترقی ایله مخالفت ائده رسه ، او میللتیمیزین غدار دوشمنی دیر. اونونلا امانسیز مبارزه ائتمه لی ییک... بیز وطنین و خالقین نجاتینی آزادلیقدا آختاریب و آرامالی ییق».
آذربایجانچی لیغین ، آذربایجان تورکچولویونون ، آذربایجان دولتچی لییی نین اساسینی دئموکراسی دا ، اوز بیله رچی لیکده گورمه لییک. بیر لشمیش ملتلر تشکیلاتی نین اینسان حاقلاری بیاننامه سینی اوزوموزه رهبر توتمالییک.
« تاریخ بیزیم عهده میزه بویوک بیر وظیفه قویموشدور. بیز آذربایجاندا سارسیلماز بیر آزادلیق قلعه سی وجوده گه تیرمه لی ییک» (پیشه وری)
هیچ نظری موجود نیست:
ارسال یک نظر