بیز نه اوچون و هانسی رئژیمله ساواشیریق؟!

سون آیلاردا دیقتی چه کن مسئله لردن بیری سویداشلاریمیزین رئژیمین ،میللی حرکته قارشی یئنی اویونلارینی ، بیر ـ بیرینده ن آییرماقدا زورلوق چکدیکلری دیر. بیزجه هر بیر سیاسی حرکتده و اوزللیک له قورتولوش مجادیله ده  سینده ، بیرینجی :موباریزه نین هدف وغایه لری بللی اولمالی دیر. ایکینجیسی: او هدفه یئتیشمک ، اولاشماق اوچون کیملرله یولداشلیق و آرخاداشلیق ائدیب، و هانسی بیر رئژیمله ده موباریزه آپاردیغیمیزی بیلمه لی ییک.

هدف میز نه دیر ؟

ایران آدلانان اولکه اوچون ساواشیریق ، یوخسا گونئی آذربایجانین مستقیل لیک و آزادلیغی اوچون ؟

اگر مقصد ایران آدلانان اولکه اوچون ساواشماقدیرسا اوردا گونئی آذربایجان مسأله سینیه یئریوخدور . بونودا بیلمک لازیمدیرکی ایران دئییله ن یئرده بیرگون دئموکراسی اولاجاغینی دوشونمک آرزودان باشقا بیر شئی دئییلدیر . ایران دئییله ن یئرده دئموکراسی نین اولماسی ایمکانسیزدیر . چونکو او اولکه دئموکراسی اساسلاری اوستونده قورولمامیشدیر. و هر هانسی رئژیم حاکمییته گلیرسه ـ گه لسین بو آیری ـ سئچگین لیک دوام ائده جکدیر. بو ایشده اینشالله ـ ماشالله لا اولان ایش دئییلدیر.

اگر آذربایجانیمیزین ایستیقلالییتی مطرح دیرسه ،او زامان آذربایجانین دوشمنلرینی تانیماق لازیمدیر . اونلارلا دوشمن کیمی رفتار ائدیلمه لیدیر. بو قارشی طرف مستعمره چی ایرقچی تئهران رئژیمی دیرسه اونا ایستعمارچی کیمین یاناشیلمالیدیر. او زامان بو مستعمره دن قورتولماق اوچون قوللاریمیزی چیرمالامالی ، بو مستعمره چی رئژیمه و او اونون بوتون اورقانلارینا قارشی بیر دوشمن کیمی حرکت ائتمه لی ییک. میثال اوچون مستملکه چی ایرقچی رئژیمین باسقی اورقانلاریندان اولان بیر پاسدار شهید ساییلا بیلمه ز. مگر اینکه رئژیمده ن آیریلیب رئژیمه قارشی ساواشدا اولموش اولسون . حتا اونون بو ایشی اونون کئچمیش جینایتلرینی باغیشلاماز. هر بیر شئی یین بیر قایدا ـ قانونو واردیر. بیزه گوره بونلاری بیر ـ بیرینه قاریشدیرانلار سیاسی ساییلا بیلمه زلر . البته رئژیم منسوبلاریدا ایستیقلال مسأله سینی لوث ائتمک اوچون بوش اوتورمامیشلار. قارداشجاسینا دئسک سویداشلاریمیز اوز دانیشیقلارینی و یازیلارینی بو معیارلار اوستونده گوتور ـ قوی ائتمه لی ، سونرا فیکیرلرینی یازیب ائشییه وئرمه لیدیرلر.

ایستیقلالی الده ائتمک بو ساده لیکده دئییلدیر ، مستقیل دوشونمک ، اوزیله مستملکه چی نین یئرینی بللی ائدیب ، قوللار چیرمالانیب مئیدنا گیریلمه لیدیر. ، بو موباریزه اولوم قالیم ساواشدیر. اولمک وار , دونمک یوخدور. ساواشدان ، سیلاحدان ، اولومده ن قورخمامالی ییق .اوز کیملی یینی تاپان ، اونا اینانان بیریسی هئچ بیر شئیده ن قورخماز. اینام هر بیر سیلاحدان گوجلودور.

اشغالچی تئهران رئژیمی نین بوتون ایداره لرینده ، مولا مجلیسینده ، اوردودا ، حتا پاسدار و بسیجی لرین و سایره نین ایچینده اولان آذربایجانلیلارا گلدیکده ،بو سویداشلاریمیز اوز بورکلرینی قاباقلارینا قویوب ، قاضی ائدیب، ده رینده ن دوشونمه لیدیرلر. اونلار اوزلریده هر گون بو ایرقچی رئژیمین توهین لرینه ، تحقیرلرینه ، آلچاتمالارینا معروض قالیرلار. حتا ایش یئرینده آیری ـ سئچگینلی یی درک ائدیرلر. اونلار مستغمره چی ـ فارس ایرقچیسی اولان تئهران رئژیمینه ، اوز میللتینی ازمکده یاردیمجی اولماق یئرینه ، مستعمره چی رئژیمین علئیهینه قالخمالی، اوز میللتی نین یانیندا یئر آلمالیدیرلار. بئله اولدوقدا طبیعی دیرکی میللتیمیز اونلارا اوز قوجاغیندا یئر وئره جکدیر.

بونو رئژیم ایچینده چالیشان آذربایجانلیلار بیلمه لیدیرلرکی مستملکه چی ، ایرقچی جینایتکار تئهران رئژیمی تورک میللتیمیزه قارشی اهانتلر ـ توهین لر و آلچاتمالارلا قالماییب ، میللتیمیزی اوز اسارت زنجیرینده ساخلاماق اوچون سیزلردن یارارلانماقدادیرلار. بونلارا بویون ایمک ، بو توهین لری گورمه مزلیکده ن گلمک بیر غئیرتلی ـ شرفلی ، ناموسلو آذربایجالی اوچون یاراشان بیر ایش دئییلدیر.

 داها بوندان آرتیق اوزونوزو، میللتینیز قارشی سیندا گوناهکار دوروما سالمایین ، رئژیمین قانلی جینایتلرینه اورتاق اولمایین ، اللرینیزی گوناهسیز اینسانلارین قانینله باتیرمایین. صاباح کی خالق و وجدان محکمه لرینده اوزونوزو گوناهکار و مجکوم دوروما سالمایین.

یاشاسین آذربایجان میللتی نین میللی قورتولوش ساواشی!

                                                                                                                                  ۲۵.۰۹.۱۳۹۵