میللی حرکتده سیاسی کادر

انقلابچی اولدوغونوسویله یب ، انقلابچی کیمی داورانمایانلارسویتاریدان باشقا بیر شئی دئیل.

چه گووارا

میللی مجادیله ده ،ان اونملی سورونلاردان بیری هئچ شبهه سیز میللی کادرین یارادیلماسیدیر.آما بو مسئله نی ائله آلماق اوچون ان باشدا و هر شئی دن اول هانسی آماجا چاتماق اوچون  کادر ؟  و بو کادر هانسی وظیفه لری اوستلنمه سی ؟ سورولارینا جواب بولمالییز.

اوحالدا آچیق دانیشا بیلمک و دوغرو و اسکیک سیز آنلاشا بیلمک اوچون وظیفه و وضعییتلر ه باغلی اساس آنلایشلار.ترمینلری دوغرو اورتایا قویمامیز لازیم.

آماج گونئی آذربایجانی ، فارس ایشغالیندان قورتارماق و میللی  دولتیمیزی ، اینسان حقلری، اجتماعی عدالت آنلایشی ایله برپا ائتمک.

  بو آماجا چاتماق اوچون ، فداکار، عالیم ، بیلینجلی ، ایش بیله ن، اوزونو  سیاسی کادر کیمی گوره ن گئجه ـ گونوزونو وطنه فدا ائده ن  قیز و اوغوللارا احتیاج واردیر.

بو سیاسی کادرلارین  موباریزه ده سهوه یول وئرمه مک اوچون ، آنالیز ائتمه گوجو نه صاحیب اولوب، علمی چالیشمالاری گره کیر.بو کاراکتئرلره مالیک اولان سیاسی کادر، علاوه اولاراق بوگونکی سرعتله گلیشن(اینکیشاف ائده ن)قلوبالاشان دونیامیزدا ،کئچه ن ۵۰ ایلده کی سیاسی آنالیز، کلاسیک فلسفی و ایجتماعی بیلیملر یئترلی(کافی) ساییلمیرلار. بوگون اونلارا علاوه اولاراق بیر نئچه خاریجی دیلیه مسلط اولماقلا یاناشی، پیسیکولوژیا بیلی ینده ن ، دونیاداکی گونلوک سیاستی آنلاییب،همن آنالیز گوجونه صاحیب اولماسی زوروملو( ضروری) و گره کلیدیر. بوگونکو سیاسی کادرلارین آنا خصوصییتلریندن بیری و ان موهومی آنا وطنی و اولکه میز آذربایجانین میللی چیخار و منافعینی مادییاتا ، مقاما فدا ائتمه مه سیدیر.باشقا سوزله دئسک ساتقین اولمامالیدیر. بوتون بو دئییله نلری ۱۲ نقظه ده آچیقلاماق مومکوندور.                                                                      

۱ـ میللی کادر ایلک اولاراق ، کلاسیک سیاسی ، فلسفی و تاریخی بیلی یه مسلط اولمالی، چونکی  بوتون آنالیز لرینده تمل بیلگینین اولماماسی اونو سهولره و یالنیش نتیجه لر آلماسینا سبب اولور.

۲ـ تئمل سیاسی ، تاریخی و... بیلی یه مسلط اولدوقدان سونرا،دونیا دوزه نینی کیملر و نه اوچون قوردوقلارینی ، گونئی آذربایجان میللی منافع آچیسیندان آنالیز آئدیب ، اونلارین بولگه میزده کی و اوزه للیک ایله اولکه میزده کی پیلانلارینی آنلاماق و آنلاماقدان سونرا نه شکیلده ته رسینه چئویرمه نین یوللارینی بولمالیدیر.

۳ـ دونیامیزداکی اولوب بیتن لری گونده لیک غزئت لردن، ده رگیلردن(مجله) کیتاب  ائلئکترونیک بیلگی  ایله تیم  قایناقلاریندان(رادییو ـ تئلویزییا ـ اینتئرنئت " بیلگی سایار")و باشقا اینفورماسییالار مرکزلریندن آلیب،بونلارین آناوطنیمیز آذربایجانین سیاسی و ایقتیصادی چیخارلاری آچیسیندان منفی و مثبت  تاثیرلرینی دوزگون ده یه رلندیره بیلمه سی سیاسی کادرلارین بیلی ییندن آسیلیدیر. بونو گوره بیلمک اوچون سیاسی کادر هرگون بیل یینی ، ایله تیم بیلگیسینی( انفورماسییاسینی) آرتیریب ، تازالامالیدیر ،

  ۴ـ عمومی و توپلومسال( ایجتماعی) پیسیکولوژییادان خبردار اولوب، اوز چیخیشلاریندا ،موناسیبتلرینده بو بیلی یین ( علمین) آنا شرطلرینی رعایت ائتمه لی، مسئله لره دویقوسالیقلا یوخ، منطیقله یاناشمالی،داورانیش و حرکتلری نین اینسانلارین اوزه رینده قیسا و اوزون وعده لی تاثیرلرینی نظره آلمالی ، آغیر ـ مسئله لره تمکینلی یاناشاراق ، قارشی طرفین ائحترامین دا قازانمیش اولور.

۵ـ اوز میللتی نین تاریخیندن ، میللی عنعنه لریندن و گله نک لریندن خبردار اولوب ،اونلاری قورویوب، ساخلاماسینا، گلیشمه سینه بئین الخالق ایجتماعیت طرفینده تانینماسینا چالیشمالیدیر.

۶ـ.طبیعی اولاراق سیاسی کادر عمومی و هر کس اسله پایلاشیلان بیلگی لرین یانیندا ، چوخ اوستونده دانیشیلمییاجاق مسئله لردن خبردار اولمالیدیر. آمما اوزون و قیسا وعده لی  اولکه نین و توپلومون منافعینی و سیاسی، ایجتماعی و ایقتیصادی چیخارلارینی دوشونه ره ک بونلارین حاقیندا دانیشمامالیدیر.سیاسی کادربن ان موهوم آناخصوصیتلریندن بیری آغزی بوتونلویودور.   

۷ـ داخیلی و خاریجی کونفرانسیلاردا و هر هانسی بیر سیاسی چیخیشلاردا ، مربوط اولان موضوع حاقدا هر چئشید اینفورماسییا ـ معلوماتی قاباقجادان الده ائدیب، هر جهتلی  حاضیرلیقلی اولمالاری گره کیر. مسئله لره منطقی و علمی یاناشیلمالی، سندلره دایانیلمالیدیر.دویقوسالیقدان اوزاق قیسا و اینفورماتیک اولمالیدیر. بونودوشونمه لیدیرلرکی حرکت ـ رفتارلاری، اوزلرینی آپاریشلاری و چیخیشلاری اونلارین یالنیز اوزلرینی یوخ ، گونئی آذربایجانی و میللی حرکتی تمثیل ائدیر.

 ۸ـ سیاسی کادرلار اخلاقی جهتدن میللتینه بیر نمونه(اورنک) اولوب، اوز دولت و میللتینه باغلی شخصیلر اولمالیدیرلار. داخیلی و خاریجی ییغینجاقلاردا،جشن لرده و مراسیملرده و قوناقلیقلاردا اوز گئیینیش و گئیینیشلرینه و دانیشیقلارینا چوخلو دیقت ائدیب اوزلرینی یوخ میللتلرینین آعتبارینی دوشونمه لدیرلر. 

٩ـ سیاسی کادرلارین ان باشدا گه لن وظیفه لریندن بیری اوز میللتی نین و اولکه سی نین هر ساحه ده میللی منافع و چیخارلارینی قوروماغی باجارماق، و هئچ بیر گوزه شته گئتمه مک و گئتمه یه ایجازه وئرمه مکدیر. دئموکراسی، اینسان حاقلاری نین مودافغه چسی اولماقلا یاناشی ، اولکه سینه و میللتینه قارشی یونه  له جک هر هانسی بیر تهلوکه نین قارشی سیندا آنا وطنین توپراق بوتونلویونو و سرحدلرینی مودافعه ائتمه یه حاضیر اولمالیدیر. دوست لارین ،دوشمنلرین توپلانتیلاریندا اوزونو نزاکتله آپارماقلا یاناشی،چوخ جیدی شکیلده میلتی نین حاقلارینی مودافعه ائتمه یی باجارمالیدیر.              

۱۰ـ سیاسی کادرلار یوخسوللوغو(پولسوز و پاراسیزلیغی)،دوسداق، شیکنجه و اعدامی وطن و میللتی نین طالعی اوچون طبیعی قبول ائتمه لی ، پول ـ پارا ، مقام ـ میز و عنوان اونو توتدوغو میللت و وطن یولوندان آییرا بیلمه مه لیدیر. چونکی دوشمنلر،اوزلرینی میللتیمیزه دوست گوسترمه یه چالیشانلار اوز مقصدلرینه اولاشماق اوچون سوزو گئده ن ایمکانلاریندان یارارلانیرلار.                     

۱۱ـ سیاسی کادرلارین ایدولوژیک باخیمدان ثابیتلی یی اولمالیدیر. بو سیاسی ثابیت لیک دوگما( فاناتیک ـ فوندانتالیست) اولماقلا هئچ بیر خلاقه سی یوخدور. مقصد سیاسی کادرین گونده بیر هاوا چالماماسیدیر. چونکی میللت و چئشیدلی سیاسی رقیبلرین و سیاسی کادلارین دانیشیق  و داورانیشلارینی(حرکتلری) گوزده ن قاچیرمیر. توپلومدا و اولکه خاریجینده بونلار ده یه رلندیریلیر، بوشخصلر و اولکه حاقدا مثبت یاخود منفی قضاوت ائدیرلر.بو او دئمکدیرکی ، سیاسی کادرین ایدولوژیک ثابیت لی یی بین الخالق سوییه ده اوستونده حئساب ائدیله جک سیاسی شخصییت کیمی تانینماسی ایله یاناشی، میللت و اولکه سی نینده بوشقابا قویولاجاق بیرمیللت و اولکه سوییه سینده گوتور ـ قوی ائدیلیر.

 ۱۲ ـ گونئی آذربایجانداکی سیاسی کادرلاریمیز یالنیز آذربایجانین بوگونکو مستملکه دوروموندان قورتولماسی یوللارینی آختارماقلا قالماییب ، آنا وطنیمیز آذربایجانین گله جه یی اوچونده اوزلرینی حاضیرلاییب، اولکه میزین مستملکه دن سونرا دیرچه لیشینی دوشونوب، میللتیمیزین رفاه و آساییش ایچینده یاشاماسی اوچونده چاره یوللارینی آختارمالیدیرلار.بو ساحه لرده ایجرا اولاجاق ایش دوزه نلری( پروگراملار) حاضیرلامالیدیرلار.بیر تک سوزله دئسک آذربایحان سیاسی کادرلاری نین بوینونا آغیر وظیفه لر دوشمکده دیر. اولکه میزین  گله جه یینین  نه شکیلده گلیشمه سی ـ اینکیشافی سیاسی کادرلاریمیزدان آسیلیدیر