قوتلو ۲۱ آذر ین ۷۱ نجی ایل دونومو !

آماج گونئی آذربایجان نین ان اونملی تاریخی گونلریندن بیریسی اولان ۲۱ آذرقیامینی یاد ائتمک ایله یاناشی اوندان گونوموزه و میللی حرکته یول گوستریجی اولان درس لری چیخارتماقدیر!

یوزلرجه کیتاب و مینلرجه مقاله دوشمانلاریمیز و میللی داوامیزا یاخین اینسانلارجا قلمه آلینمیشدیر و هر کس دونیا گوروشو ایله ۲۱ آذرده باش وئره نلری قارالاماغا و آیدینلاتماغا چالیشمیشدیلار!

هئچ شبهه سیز چوخلی یازی و سندلر ، تاسف لر ایله سویوق ساواش دونمینین تاثیری آلتیندا یازیلدیغی اوچون گئرچک لری اولدوغو کیمی یوخ ایسته دیکلری اوچون حاضیرلانمیشدیر ، اونون اوچون حالا بو تاریخی حادیثه حقینده آراشدیریلمایا ، آیدینلاتماغا چوخلی احتیاجیمیز واردیر!

بوگون بورادا چوخ قیسا و ساده جه بو موضوعو دارتیشماغا آچماق اوچون ۲۱ آذر ین سونراکی قوشاقلاراوزه رینده کی تاثیر و اوندان آلدیقلاری درسلری و میللی حرکتین نه قه ده ر اوندان الهام آلدیغینا گوز آتاماق قصدیمیز وار .

۲۱ آذر قیامی بیرمیللتین ایللر بویو آیریمجی – دیکتاتور سیستم ایچینده آسیمیله یه معروض قالان و هر مدنی اعتراضینی قانا بولایان رئژیمه قارشی بین الملل شرایطی ده ، ده یرلندیره رک اوز مقددراتینی اوز الینه آلماق اوچون وئردیغی ان دوغال و بین الملل حقوقدا تانینان مشروع بیر حرکت ایدی .

دوست و دوشمانلاریندا دیله گئتیردیکلرینه گوره بیرایل بویو و یعنی چوخ قیسا بیر زاماندا اقتصادی ، اجتماعی ،کولتورل آچیدان گوزایله گورونن مدرن و دمکراتیک ده یشیملر خالقیمیزی موتلی ائتدیغی کیمی دوشمانلاریمیزیدا قورخویا سالدی و تاسف لر ایله چیرکین بیر آنلاشمانین نتیجه سینده ، بیلینجلی اولاراق ۲۱ آذرین ایل دونومونده قتل عام یولو ایله حرکتی دوردورماغا چالیشدیلار و گره کینی ده فجیع بیر شکیلده یئرینه یئتیردیلر.

دوشمن  ودوست گورونن دوشمانلاریمیز نه قه ده ر ده ۲۱ آذری بیلینجلی اولاراق ایسته دیک لری کیمی قلمه آلیب و گئرچک لری اورت- باس ائتسه لرده یئنی نسیل آذربایجان مبارز اولادلاری اوز تاریخ و میللی کیملیکلرینی ایمکان داخیلینده قورویوب ساخلامایا چالیشدیلار. اوزوله ره ک اعتراف ائتمه لییک کی انسانلاریمیزین بویوک بیر بولومو ده ، بوتون صداقت و فداکارلیق لارینا باخمیاراق ، بیله – بیلمی یه باشقا بیر یولا ساپدیلار.

بونون نه ، نیه و نه دن اولدوغون بیلمک اوچون ، اونجه باشقا سورولاری جوابلاندیرماق لازیمدیر:

۱- نیه بیزلر کوردلر کیمی میللی پارتیلاریمیزی قورویوب ساخلایامادیق؟

۲- نیه ۲۲ بهمندن سونرا فرقه منصوب لاری قاسیملو کیمی اوز دوغما توپراقلارینا دونمه دیلر؟

۳- نیه بیز اسلامچی ، مارکسیست ، لیبرال اولورکن میللتچی اولابیلمیریک؟

۴- نیه ۲۱ آذر قهرمانلاری و اونلارین مجادیله لری قازانجلاریندان چوخ ضعف لری ائله آلینیب ، ارتجاعی بیرحرکت اولاراق باخیلدی؟

۵- بو گون میللی حرکت ۲۱ آذرحرکاتیندان دوزگون درس لری آلمیش می؟

۶- میللی حرکت اوز قورتولوش یولوندا ۲۱ آذرقیامینین هانسی خطالارینی تکرارلامامالیدیر؟

صمد بهرنگی ، بهروز دهقان ، علیرضا نابدل ، مرضیه اسکویی و... ایگید آذربایجان اولادلاری رژیمین اوزونو تثبیت ائتدیغینی ساندیغی بیر دونمده ، اوز دیل و ادبیلتلارینا وئردیکلری اونم و فدائی اردوسونون آدینی اوز حرکتلرینه سئچمه لری میللی قیام ، نه قده ر اونلار اوزه رینده ائتکی قویسادا ، تاسف لر ایله او دونمین بلوک لاشمیش دونیاسیندا و رئال گورونن مجادیله نی قبول گوره ره ک میللی حرکتی نابدل ین «مسئله ملی» کیتابیندادا یازدیغی کیمی ارتجاعی بیر حرکت گوره ره ک پراگماتیست یاخلاشیم یعنی انترناسیونال چاتیسی آلتیندا آزادلیق و قورتولوش مجادیله سی ایله بوتون میللتلرین اوزگورلشمه سینه اینانماق و او سیستمده اوز میللتی نین ده اوزگورله شه جه یین دوشوندولر و تاسف لر ایله بوتون صداقت و فداکارلیق لارینن نتیجه سی بو اولدوکی گینه فارش راسیسمی باشاق بیر آدی ایله قازاناراق باشفا میللتلری ده آذربایجان تورک لری کیمی اسارت آلتیندا بو گونه قدر توتماغا نایل اولدو.

بیزجه اساس مسئله ،‌ میللی ایستک لر بیزیم اوچون نه مفهومون داشیماقدان گئچیر ،یعنی بیر آنلامدا سیزین اوچون میللی ایستک لر آماج و یا آراج دیر سوروسونا جواب وئرمک ایله بئلیرله ندیریلیر!

مثلا کوردلر میللی حقلرینین آلماغی اوزلرینه آماج اولاراق سئچتیک لری اوچون ، دونیا ده نگه لری ، دولت لر ایله ایلیشگی ، دین، دمکراسی ، ایدیولوژی ، مبارزه متد لاری و... اونلار اوچون آراج سایلیر، ائله اونون اوچوندورکی روسلار، باتی، امریکا ، اسرئیل ، عربلر، تورکیه ، ایران ، مارکسیست ، سوسیال دمکرات، لیبرال، اسلامچی و.... ایله دوستلوق قوروب و بو دوستلوق واسیطه سیله اونلاری اوز آنا آماجلارینا خدمت اوچون قوللانیرلار.

اما بیز مارکسیت اولوب ، کاپیتالیسمه قارشی جبهه آلیریق ، سوسیالیست اولوب مسلمانا قارشی حرکت ائده ریک، انترناسیونالیست اولوب میللی ایستکلره قارشی چیخاریق،دمکرات اولوب دوشمانین قانلی سالدیری لاربنا قارشیلیق وئرمه نی پیسله ریک.اوزوموزو عاغیللی سانیب آذربایجانا قانع اولموروق بوتون ایران آدلانان اولکه نی ایستیریک دیه ،مستقیللیک یولوندا مجادیله ائدن میللی فعاللاریمیزا یئردن گویدن سالدیریریق. نیه سی بئلیدیر بیزیم چوخلاریمیز اوچون میللی ایستک لریمیز آماج دئیل ،‌ بلکی آراجدیر !

یوخسا نیه بیرینجی قوشاق ۲۱ آذر آماجلارین اونوتوب دا فارس میللتینه منصوب شخص لرینن کی بیزیم هویتیمیز و وارلیغیمیزا اینانمیردیلار ایله بیرلشیب دمکراتیک انقلاب پئشینه دوشدو،

دونیا ده نگه و یئنی دوزه نی نظره آلاراق، سوسیالیت اولساقدا، نیه کوردلر کیمی میللی تشکیلاتیمیزی یارادیب شرطلر ایله اویغونلاشدیریب و زامانین یئتیشمه سینی گوزلرکن کادرلاریمیزیدا و... حاضیرلامادیق!

بیزجه یوخاریداکی سورولارین ۱ الی ۴ قده رینین قیسا جا جوابی اله بودور کی ؛ میللی ایستک بیزیم اوچون آماج یوخ آراج گیبی قوللانمیشدیر .

اما گئله لیم ۵ و ۶ سورونون جوابینا: بیزجه میللی حرکت هم ۲۱ آذر قیامیندان و هم شمالی آذربایجانین ایستقلالیندان جوشوب و درس آلمیشدیر ، لاکین بعضن گورونن چاتیزمامازلیق لار حرکتدن یوخ؛ بلکی حرکته نفوذ ائده نلردن قایناقلانیرکی زامان ایچینده اونلارین تمیزلن مه سی گره کیر.

درس آلمیش ایسته میش اولساق، بو درس لر بونلاردان عبارت اولمالیدیر:

۱- میللی ایستک حرکت اوچون آراج یوخ آماج اولمالیدیر.

۲- یاشیل حرکاتئندا ،گوستردی کی بو حرکت ،فارس راسیسمینین اویونونا دوشمه مه ک اوچون بیلینجلی حرکت ائدیر! و ها بئله اثبات ائتدی کی تورک میللتی هر بیر هانگی سیاسی اولایلاردا یاناشماییب و اولماسا بو جغرافیادا بیر جیددی دئیشیم اولمایاجاقدیر.

۳- میللی حرکتین اوزونون ایلکه لری وار و باشقا ایدئولوژی لره احتیاجی یوخدور!

۴- بین الملل ارتباطاتدا اساس مسئله نی میللی چیخارلار گوروب و سویوق ساواشین سونا گئلمه سینه اینانماق شرط دیر!

۵- دگماتیزمدن اوزاقلاشاراق ، بین الملل قوه لرین نه دوشوندوقلاریندان داها چوخ میللی چیخارلاریمیزی نه جور حیاتا کئچیریک دئیه ،‌ دوشونمه لییق!

۶- میللی مجادیله ده قورتولوشا قدر، ایدئولوژی و صئنفی ایستک لری اون پیلانا چیخارتماماقی قبول گورمه مه لییق!

و هئچ شبهه سیز ،‌ میللی حرکت ۲۱ آذر دن آلدیغی درس لر سایه سینده ، ایلک اولاراق گوجلی میللی تشکیلاتلار و اونو سوی قیریملاردان قورویان قوه لر یاراتیب ، خالق حمایه سین قازاندیردیقدان سونرا، دونیا ده نگه لرین ایدئولوژی باغلیلیقلار ایله یوخ ، بلکی گئرچک و علمی آنالیز لری ایله ،‌ بئلیرله دیکدن سونرا بین الملل حقوق چرچیوه سینده قورتولوشا چاتیب ، میللتیمیزین یاریم قالان رفاه ،عدالت و آزادلیق یوللارینداکی اجتماعی ، سیاسی ، کولتورل و ... ده یشیملرین تاماملاراراق ، گوسته ره جک لرکی ۲۱ آذر و اونون شانلی خاطیره سی بیزیم قورتولوش مبارزه میزین بایراغی اولاراق آذربایجان تورکی وار اولدوقجا اورک لریمیزده یاشایاجاقدیر !

نه موتلویوق کی ۲۱ آذریمیز وار !

یاشاسین ۲۱ آذرین شانلی خاطیره سی!

یاشاسین میللی حرکتیمیز!

۱۰.۱۲.۲۰۱۶